en fy eu mk sl ga

Focail Eile

2016-12-05 15:00 —

Féasta Filíochta na Fleidhe

Ócáid thar a bheith pléisiúrtha a bhí san Fhéasta Filíochta i gCultúrlann McAdam Ó Fiaich mar chuid de Fhleadh Feirste Dé Sathairn an 3 Nollaig.

Is é Naoise Ó Cairealláin a bhí i mbun an Féasta a eagrú i gcomhair le coiste Liú Lúnasa agus bhí JJ Ó Dochartaigh mar fhear an tí.

Tugadh cuireadh do na filí Séamus Barra Ó Suilleabháin, atá lonnaithe i dtuaisceart Chiarraí, agus Yoseba Peňa, ó Thír na mBascach, i measc filí eile a bheith páirteach sa léamh.

Bhí togha gach bia agus rogha gach dí sa Dánlann agus aithris ar dhánta fite fuaite tríd an lón.

Léigh Séamus Barra roinnt dánta as a dhíolaim nua filíochta Beatha Dhónaill Dhuibh agus tharla gur Lá Idirnáisiúnta theanga na Bascaise a bhí ann, léigh Yoseba roinnt dánta ó fhilí clúiteacha ó Thír na mBascach agus bhí grúpa beag Bascach i láthair chun éisteacht leis. Léadh na haistriúcháin Gaeilge chomh maith. D’aistrigh Koldo Izagirre roinnt dánta de chuid Phádraig Mhic Phiarais go Bascais níos luaithe i mbliana mar chomóradh ar Éirí Amach 1916 agus léadh Fornocht do Chonac Thú i nGaeilge agus i mBascais.

 Tháinig  Seán Ó Ríordáin ar an saol céad bliain ó shin agus d’aithris Gearóid Ó Cairealláin sliocht as Fill Arís, dán a scríobh an Ríordánach ag deireadh a shaoil.

Seoladh Beatha Dhónaill Dhuibh le Séamus Barra ag deireadh na hócáide.

 Bhain gach duine sult as an lá.

Tuilleadh eolais faoi imeachtaí sa Chultúrlann http://www.culturlann.ie

Tilleadh eolais faoi Liú Lúnasa móide go leor griangraf eile a tógadh ar an lá ar fáil anseo: https://twitter.com/feileliu_lunasa