en fy eu mk sl ga

Elvira Bonafacio

2018-09-27 13:30 — Belfast, Ireland

Cura kiko? Unda esei?

Esaki ta un di e promé reakshonnan ku mi ta haña na momentu ku mi bisa ku mi ta bini for di Kòrsou.“E ta un isla den Karibe. Antes e tabata forma parti di Antia Hulandes. Bo a yega di tende di e Islanan A.B.C.? Un isla ku ta keda na e kosta nort di Venezuela”, esakinan ta algun deskripshon ku mi ta usa pa purba splika for di unda mi ta bini.... Pero echo ta, ku pa esun bibá aki na Nort Oropa, Kòrsou ta un isla deskonosí.

Pues promé mi kuminsá konta di mi eksperensia, deskribí opservashon, similaridat i diferensia kultural  etc; laga nos kuminsá na sera konosí, kontestando e preguntanan: Unda Kòrsou ta keda? Kiko ami ku bo sa di Irlanda?

Kòrsou, un isla ku un largura di 64 km i un superfisie di 444 km kuadrá. E punta di mas haltu no ta un seru, sino un seritu di 372 kilometer ku yama Seru Kristof. Na Kòrsou tin mas o ménos 160.000 hende di diferente kultura ta biba. Mi isla ta multi kultural i mayoria hende ta papia kuater idioma entre nan: Papiamentu ta e idioma prinsipal i materno, hulandes, ingles i spañó (ku nos ta siña na skol i riba kaya).

 

 Pa mi, mi isla ta un réplika di paraiso. Bo sa dikon? Pasobra mi por landa den un laman ku awa kristalino rondoná pa turtuga. Sinta kas habrí òf pafó di kas henter aña, i disfrutá di un bientu suave i fresku ku ta kalma e temperatura di promedio 27 grado Celsius. Ora mi lanta mainta, mi ta tende para kanta na mi bentana, i na mes momentu mi por disfrutá di e ritmo harmonioso di blachi di palu, ku ta zoya riba ritmo di bientu. No ta sufisiente motibu pa bo sinti bo den paraiso? Anto bo sa kiko ta interesante di nos klima, ku apesar ku e temperatura por subi den temporada di orkan, òf baha den temporada di áwaseru, semper e wer lo ta meskos. Ku otro palabra, na Kòrsou no tin diferente temporada klimatológiko, serka nos na Kòrsou ta verano henter aña.   

Tene kuenta ku no ta e ubikashon i klima so ta hasi mi isla un paraiso. Pa loke ta paisahe, nos flora i nos founa ta masha simpel, pero na mes momentu interesante. Sigur pa un isla ku ta konsiderá di tin un klima trópiko seku. Yuana, prikichi, chuchubi, trupial, biná i konènchi di mondi ta algun di e animalnan típiko pa nos isla, i pa loke ta bestia feros....

Si mi no ta kibuká nos tin un tipo di bestia feros, kual ta e Yu di Kòrsou....hahahah.  Dependiente di su ambiente i impulso, e por transformá den un ser temeroso... Simplemente pasobra e ta masha bondadoso, multi talentoso, amabel i gusta ambiente. No ta sufisiente motibu pa mi yama mi isla un réplika di paraiso?

  Bo ke sa mas di Kòrsou, bishitá https://www.curacao.com/   

M’a kaba di kontestá bo e promé pregunta, pero falta un mas: Kiko e yu di Kòrsou sa di Irlanda? Mi ta konta bo den e siguiente artíkulo.